O‘zbekistonda abituriyentlarning 41 foizi test sinovlarida minimal ballni to‘play olmadi

2025-yilda jami 614 768 abituriyent test sinovlarida ishtirok etdi. Ulardan 253 844 nafari yoki 41,29 foizi minimal 56,7 ballni to‘play olmadi.

Eng past natijalar Andijon viloyatida qayd etildi — bu yerda abituriyentlarning 47,6 foizi belgilangan chegaradan o‘ta olmadi. Eng yaxshi ko‘rsatkichlar esa Buxoro viloyati va Toshkent shahrida kuzatildi — bu hududlarda “yetarli ball to‘play olmaganlar” ulushi 31,4 foizni tashkil etdi.

Taqqoslash uchun: 2023-yilda mamlakatning 8 ta hududida, 2024-yilda esa 4 ta hududida abituriyentlarning yarmidan ko‘pi minimal chegaradan o‘ta olmagan edi. 2025-yilda bunday natija qayd etilmadi.

O‘tgan yilga nisbatan eng katta o‘sish quyidagi hududlarda kuzatildi:

• Qoraqalpog‘iston Respublikasi — +9%;

• Navoiy viloyati — +8,9%;

• Sirdaryo viloyati — +8,1%;

• Buxoro viloyati — +7,8%;

• Qashqadaryo viloyati — +6%.

Eslatib o‘tamiz, 56,7 ball minimal o‘tish darajasi bo‘lib, bu maksimal 189 ballning 30 foiziga tengdir.