O‘zbekistonda alohida qimmatga ega tabiiy obyektlar reyestri yaratiladi.

O‘zbekistonda milliy tabiiy meros obyektlarining rasmiy reyestri shakllantiriladi. Tegishli nizom hukumat tomonidan tasdiqlandi.

Yangi mexanizm noyob tabiiy hududlarni tizimli muhofaza qilish va ularning buzilishining oldini olishga qaratilgan. Jumladan, ruxsatsiz qurilishlarga cheklovlar joriy etiladi.

Nimalar o‘zgaradi

Hujjatga ko‘ra, alohida qimmatga ega tabiiy obyektlar:
— yagona davlat reyestriga kiritiladi;
— maxsus muhofaza ostiga olinadi;
— qat’iy ekologik talablar asosida foydalaniladi.

Vakolatli organ etib Ekologiya va iqlim o‘zgarishi bo‘yicha milliy qo‘mita belgilandi.

Obyektlar toifalari

Reyestr to‘rtta asosiy toifani o‘z ichiga oladi:
— biologik — noyob o‘simliklar, qo‘riqlanadigan hududlar va hayvonlar yashash joylari;
— geologik — noyob jinslar, g‘orlar va qoyatosh shakllari;
— gidrologik — ko‘llar, daryolar va buloqlar;
— paleontologik — qadimiy qazilma topilmalari joylashgan hududlar.

Reyestrga kiritish tartibi

Jarayon bir necha bosqichdan iborat:
— tashabbuskor hududiy bo‘linmaga ariza topshiradi;
— obyekt tavsifi, geolokatsiya hamda foto va video materiallar ilova qilinadi;
— mutaxassislar joyiga chiqib o‘rganish o‘tkazadi;
— 5 kun ichida reyestrga kiritish bo‘yicha qaror qabul qilinadi.

Mazkur qaror mamlakatning ekologik siyosatini to‘ldiradi. Avvalroq O‘zbekistonda “ekologik toza hudud” maqomi joriy etilib, u allaqachon Bo‘stonliq va Zomin tumanlaridagi turizm zonalarida qo‘llanilmoqda.

Kutilishicha, reyestr yaratilishi tabiiy merosni asrash, ekologik nazoratni kuchaytirish va ekotizimlar barqarorligini oshirishga xizmat qiladi.