Abdulaziz Kamilov: O‘zbekiston va AQShning xalqaro masalalardagi pozitsiyalari tobora yaqinlashmoqda

O‘zbekiston prezidenti maslahatchisi Abdulaziz Kamilovning aytishicha, Toshkent va Vashingtonning mintaqaviy hamda global masalalardagi qarashlari tobora yaqinlashib bormoqda. U bu haqda “O‘zbekiston 24” telekanalining Davra podkastida so‘z yuritdi.

Kamilovning ta’kidlashicha, AQSh dunyodagi eng ilg‘or texnologiyalarga ega va iqtisodiy jihatdan eng qudratli davlat bo‘lib qolmoqda. So‘nggi yillarda Toshkent va Vashington o‘rtasidagi o‘zaro tushunish darajasi sezilarli darajada oshgan.

— Bugun prezident Trampning qarashlari va bizning mintaqaviy hamda xalqaro masalalardagi pozitsiyalarimiz tobora yaqinlashmoqda, — dedi Kamilov.

Prezident maslahatchisi, shuningdek, AQShning G‘azada urushni to‘xtatish bo‘yicha yangi tashabbusini qo‘llab-quvvatladi. Uning so‘zlariga ko‘ra, amerikalik tomonning rejasi 20 banddan iborat bo‘lib, u garovga olinganlarni ozod qilish, Isroil qo‘shinlarini olib chiqish, HAMAS a’zolariga amnistiya berish, xalqaro kuchlarni kiritish va tashqi ma’muriyat tashkil etishni nazarda tutadi.

Kamilov prezident Shavkat Mirziyoyev G‘azada zo‘ravonlikni to‘xtatish va mojaroni tinch yo‘l bilan hal etishga doimiy ravishda chaqirib kelayotganini eslatdi.

— Agar bu jarayon davom etsa va tinchlikka erishilsa, prezidentimizning pozitsiyasi yanada AQSh pozitsiyasiga yaqinlashadi, — dedi u.

Kamilovning so‘zlariga ko‘ra, Toshkent AQSh bilan ham iqtisodiy, ham siyosiy sohalarda hamkorlikni mustahkamlash niyatida.

Eslatib o‘tamiz, avvalroq Shavkat Mirziyoyev BMT Bosh Assambleyasining 80-sessiyasi doirasida AQShga tashrifi chog‘ida prezident Donald Tramp bilan muzokaralar o‘tkazgan edi. Tomonlar qiymati 105 milliard dollardan ortiq bitimlarni imzolagan bo‘lib, bu ikki davlat o‘rtasidagi strategik hamkorlikni yangi bosqichga olib chiqdi.