Hujjatlar imzolandi: Mirziyoyev va Erdo‘g‘an Anqarada nimalarga kelishdi

Anqarada bo‘lib o‘tgan Oliy darajadagi Strategik hamkorlik kengashining to‘rtinchi yig‘ilishi yakunlariga ko‘ra O‘zbekiston prezidenti Shavkat Mirziyoyev va Turkiya prezidenti Rajab Toyyib Erdo‘g‘an ikki tomonlama hujjatlar paketini imzoladi. Ular O‘zbekiston va Turkiya o‘rtasidagi keng qamrovli strategik sheriklikni yanada chuqurlashtirishga qaratilgan.

Asosiy hujjatlar sifatida davlat rahbarlarining Qo‘shma bayonoti hamda hamkorlikning aniq mexanizmlarini joriy etish to‘g‘risidagi qaror qabul qilindi. Ushbu hujjatlar tomonlarning hamkorlikni kengaytirish va erishilgan kelishuvlarni amaliy bosqichga o‘tkazishga bo‘lgan siyosiy irodasini mustahkamlaydi.

Bundan tashqari, ikki mamlakat hukumatlari qator sohaviy kelishuvlarni ham tasdiqladi. Ular yadro va radiatsiya xavfsizligidan tortib, mehnat migrantlarini vatanga qaytarish masalalarigacha bo‘lgan keng yo‘nalishlarni qamrab oladi. Xususan, harbiy tibbiyot, sog‘liqni saqlash va ta’lim sohalarida hamkorlikni rivojlantirish bo‘yicha kelishuvlarga erishildi.

Kelishuvlarning muhim qismi iqtisodiyotga oid. Xalqaro transport yo‘laklarini rivojlantirish, maxsus iqtisodiy zonalarni qo‘llab-quvvatlash hamda tog‘-kon sanoatida hamkorlik bo‘yicha hujjatlar imzolandi. Bu chora-tadbirlar o‘zaro savdo hajmi va investitsiya faolligini oshirishga xizmat qiladi.

Xavfsizlik, diplomatiya va madaniyat masalalariga ham alohida e’tibor qaratildi. 2026–2027-yillarga mo‘ljallangan Tashqi ishlar vazirliklari o‘rtasidagi hamkorlik dasturi hamda Madaniy hamkorlik rejasi tasdiqlandi. Shuningdek, yadro obyektlarini jismoniy himoyalash va radiatsiya xavfsizligi sohasida axborot almashish bo‘yicha kelishuvlarga erishildi.

O‘zbekiston va Turkiyaning diniy idoralari ham hamkorlikni alohida protokol bilan rasmiylashtirib, ikki xalqning mushtarak ma’naviy va madaniy qadriyatlarini yana bir bor ta’kidladi.