Toshkentdagi momaqaldiroq uchta xalqaro reysning yo‘nalishini o‘zgartirishga majbur qildi

10 fevral kuni kechqurun Toshkent xalqaro aeroporti hududida kuzatilgan kuchli momaqaldiroq xalqaro aviareyslar bajarilishiga ta’sir ko‘rsatdi. Bir nechta samolyotlar vaqtincha zaxira aeroportlarga yo‘naltirildi.

Uzbekistan Airports xabariga ko‘ra, Uzbekistan Airways aviakompaniyasining ikki reysi Samarqand aeroportiga yo‘naltirilgan:
— Male shahridan uchib kelayotgan HY3526 reysi;
— Ostona shahridan kelayotgan HY722 reysi.

Shuningdek, China Southern Airlines aviakompaniyasining Pekin — Toshkent yo‘nalishida parvoz qilgan CSN6027 reysi Bishkek aeroportiga qo‘nishga majbur bo‘lgan.

Avvalroq O‘zgidromet beqaror ob-havo sharoitlari haqida ogohlantirgan edi. Sinoptiklar ma’lumotiga ko‘ra, 10–13 fevral kunlari mamlakat hududiga nam havo massalari kirib kelib, momaqaldiroq va shamol kuchayishi bilan kuzatilgan.

Ob-havo sharoiti barqarorlashgach, reyslar belgilangan yo‘nalishlar bo‘yicha parvozlarni davom ettirdi.