Toshkentdan 87 ta ifloslantiruvchi korxona ko‘chiriladi, birinchisi «Uzvtortsvetmet» bo‘ladi

Toshkentda ekologik xavfli va energiya talab qiluvchi korxonalar ro‘yxati tuzildi, ularni bosqichma-bosqich poytaxtdan ko‘chirish rejalashtirilgan. Ro‘yxatga jami 87 obyekt kiritildi. Bu haqda O‘zbekiston Milliy ekologiya va iqlim o‘zgarishi qo‘mitasi ma’lum qildi.

Korxonalarni ko‘chirish ishlab chiqarishni majburiy modernizatsiya qilish va texnologik jarayonlarni zamonaviy ekologik standartlarga moslashtirishni nazarda tutadi. O‘tgan yilning may oyidan Toshkent, Nukus va viloyat markazlarida metallurgiya, chiqindilarni qayta ishlash va yoqish, sement va asbest ishlab chiqarish kabi ekologik xavfli sohalarda yangi loyihalarni amalga oshirish taqiqlangan edi.

Havo sifatini yaxshilash bo‘yicha maxsus komissiya xabariga ko‘ra, ko‘chiriladigan korxonalardan birinchisi «Uzvtor­tsvetmet» bo‘ladi. Toshkentning Yangihayot tumani sanoat hududida joylashgan zavod ikkinchi darajali rangli metallarni yig‘ish va qayta ishlash bilan shug‘ullanadi va ekologik xavf jihatidan I toifa obyekt hisoblanadi.

Zavod Jizzax viloyatidagi erkin iqtisodiy zonaga ko‘chiriladi. Mazkur korxonaning bir qismi 1970-yillardan beri ishlatilayotgan uskunalardan iborat. Oktyabr oyida zavodga majburiy ekologik buyruq berildi va ekologik zarar uchun 18 mlrd so‘mdan ortiq kompensatsiya ajratildi.

Ko‘chirish jarayonida eskirgan va ekologik zararli eritish pechlari utilizatsiya qilinadi, ishlab chiqarish esa yangi, zamonaviy va ekologik talabga javob beradigan uskuna asosida davom ettiriladi.

Qo‘mita baholashicha, faqat «Uzvtor­tsvetmet»ni ko‘chirish havoga chiqadigan ifloslantiruvchi moddalarni yiliga taxminan 226,7 tonna kamaytirishga imkon beradi.

Shuningdek, ilgari Toshkentdagi V. L. Galparin nomidagi truba zavodi va metall chiqindilarni saralash va presslash bilan shug‘ullanuvchi «Vtorchermet» poytaxt filialiga ham majburiy ekologik buyruqlar berilgan edi.