Adliya vaziri pedofiliya uchun umrbod ozodlikdan mahrum qilish jazosining joriy etilishi yuzasidan izoh berdi

O‘zbekiston adliya vaziri Akbar Toshqulov pedofiliya uchun umrbod ozodlikdan mahrum qilish jazosini joriy etish rejalari yuzasidan munosabat bildirdi. Bayonot 20-fevral kuni “O‘zbekiston — 2030” strategiyasiga bag‘ishlangan matbuot anjumanida yangradi.

Vazirning ta’kidlashicha, so‘nggi yillarda mamlakatda bolalar va ayollarga qarshi jinoyatlar soni ortmoqda. U avval ayrim jinoyat tarkiblari bo‘yicha jazolar liberallashtirilganini eslatib, biroq hozirgi kriminogen vaziyat yondashuvlarni qayta ko‘rib chiqishni talab qilayotganini qayd etdi.

“Jazoning asosiy maqsadi — jinoyatlarning oldini olish va aybdorlarni tuzatish. Biroq tahlillar bolalar va ayollarga qarshi jinoyatlarda murakkab hamda xavotirli tendensiyalar mavjudligini ko‘rsatdi. Xorijiy tajriba, jumladan qo‘shni davlatlar amaliyoti o‘rganilib, jinoiy javobgarlikni kuchaytirish zarur degan xulosaga kelindi”, — dedi Akbar Toshqulov.

Uning so‘zlariga ko‘ra, qonun loyihasi hozirda ishlab chiqilmoqda. Jarayonda Adliya vazirligi, Ichki ishlar vazirligi, Bosh prokuratura hamda Oliy sud ishtirok etmoqda. Hujjat tayyor bo‘lgach, jamoatchilik muhokamasiga taqdim etiladi.

Pedofiliya uchun umrbod ozodlikdan mahrum qilish jazosini joriy etish 2026 yilga mo‘ljallangan davlat dasturida nazarda tutilgan bo‘lib, u Prezident Shavkat Mirziyoyev tomonidan tasdiqlangan.