Bir yil ichida AQShdan qariyb 700 nafar O‘zbekiston fuqarosi repatriatsiya qilindi

So‘nggi bir yil davomida AQShdan O‘zbekistonga qariyb 700 nafar fuqaro qaytarildi. Bu haqda O‘zbekiston Tashqi ishlar vazirligi huzuridagi “Dunyo” axborot agentligi xabar berdi.

Joriy hafta mamlakatga yetib kelgan navbatdagi repatriatsiya reysi yil boshidan buyon 11-reys bo‘ldi. Ushbu parvoz orqali 44 nafar O‘zbekiston fuqarosi vatanga olib kelindi. Ularning aksariyati Meksika orqali AQSh chegarasini noqonuniy kesib o‘tishga uringanidan so‘ng bir necha oy davomida AQShdagi migratsiya markazlarida saqlangan.

Avvalroq “Gazeta” nashri xabar berganidek, parvoz Amerikaning Omni Air International charter aviakompaniyasiga tegishli Boeing 767-300 samolyotida amalga oshirilgan. Havo kemasi 20-yanvar kuni AQShning Meksika bilan chegaradosh Texas shtatidagi El-Paso shahridan uchib chiqib, AQSh, Ruminiya va Armanistonda texnik qo‘nishlarni amalga oshirgan holda 21-yanvar kechasi Toshkentga yetib kelgan. Aeroportda vatandoshlarni TIV va boshqa tegishli idoralar vakillari kutib oldi.

“Dunyo” agentligida ta’kidlanishicha, har bir bunday reys O‘zbekiston va AQSh vakolatli organlarining uzoq muddatli hamda muvofiqlashtirilgan hamkorligi natijasidir. Bu faoliyat respublikaning xorijdagi fuqarolari huquqlari, qonuniy manfaatlari va xavfsizligini himoya qilish borasidagi izchil pozitsiyasini aks ettiradi.

Repatriatsiya qilinganlarning ko‘pchiligi hukumatga ko‘rsatilgan yordam uchun minnatdorlik bildirib, vatandoshlarni noqonuniy migratsiya yo‘lini tanlamaslikka chaqirdi. Ulardan biri deyarli bir oy davomida bir necha davlat, jumladan Meksika orqali AQShga yetib borish uchun taxminan 23 ming dollar sarflaganini, so‘ngra uch oy vaqtincha saqlash markazida qolganini aytdi.

“Ba’zilari u yerda yillar davomida qolib ketadi. Bu insonni ma’naviy va jismonan sindiradigan og‘ir sinov. Shuncha pul sarflab, huquqsiz va kafolatsiz holda begona davlatda qolish — bunga arzimaydi”, — dedi u.

Yana bir qaytarilgan fuqaro esa taxminan 20 ming dollar sarflaganini va bir necha oy migratsiya markazida bo‘lganini ma’lum qildi. Uning so‘zlariga ko‘ra, saqlash sharoitlari qamoqxonani eslatgan.

“Bu yo‘lni hech kimga tavsiya etmayman. AQShga faqat qonuniy yo‘l bilan borish kerak. Legal maqom huquqlar, hujjatlar va hayotni yo‘lga qo‘yish uchun real imkon beradi”, — dedi u.

Kontekst

AQShning Immigration and Customs Enforcement (ICE) xizmati 2023-yil oktyabrida 13,6 mingdan ortiq O‘zbekiston fuqarosi Meksika orqali AQShga kirishga uringan paytda qo‘lga olinganini ma’lum qilgan. O‘sha yil noyabrida AQSh rasmiylari bunday migrantlar mamlakatga kiritilmasligi va immigratsiya ishlari ko‘rib chiqilguniga qadar qamoqda saqlanishini bildirgan.

2024-yilning to‘qqiz oyida AQSh 572 nafar O‘zbekiston fuqarosini deportatsiya qilgan — bu o‘tgan yilning mos davriga nisbatan 6,5 barobar ko‘p. Donald Tramp hokimiyatga kelganidan so‘ng noqonuniy migratsiyaga qarshi operatsiyalar sezilarli darajada kengaytirildi. O‘zbekiston hukumati AQSh bilan fuqarolarni xavfsiz qaytarish masalasida yaqin hamkorlik olib borilayotganini ma’lum qilgan.