«Ekologik transport» tizimidagi jarimalar 2028 yildan kuchga kiradi

O‘zbekistonda «Ekologik transport» tizimi talablarini buzganlik uchun jarimalar 2028 yildan joriy etiladi. Shu bilan birga, tizimning o‘zi 2026 yil yanvaridan ishlay boshlaydi. Bu haqda IIV Jamoat xavfsizligi departamenti SBDD matbuot kotibi Zo‘ir Yo‘ldashev ma’lum qilgan, deb xabar beradi UzA.

Tizim ishga tushirilgandan so‘ng barcha transport vositalariga uch rangdagi ekologik stikerlar — yashil, sariq yoki qizil beriladi. Rang avtomobilning ekologik klassi va chiqindilar darajasiga bog‘liq bo‘ladi.

Moslashuv davri ikki yilni tashkil etadi. Shu vaqt davomida sariq va qizil stikerga ega avtomobil egalari transport vositasining ekologik klassini oshirish va stiker rangini o‘zgartirish uchun texnik diagnostika yoki ta’mirdan o‘tishi mumkin bo‘ladi. Past ekologik klassga ega avtomobillarning «toza hudud»larga kirishi uchun jarimalar faqat o‘tish davri tugagandan keyin qo‘llanadi.

IIV vakillarining so‘zlariga ko‘ra, barcha transport vositalari va ularga berilgan stikerlar haqidagi ma’lumot yagona elektron tizimda jamlanadi. Bu cheklangan ekologik ruxsatga ega avtomobillarning taqiqlangan hududlarga kirish harakatlarini avtomatik qayd etishga va haydovchilarga xabar berishga imkon beradi. Nazorat katta shaharlarda allaqachon ishlayotgan videokameralar va boshqa texnik vositalar orqali amalga oshiriladi.

Avvalroq xabar qilinishicha, «Ekologik transport» tizimi bosqichma-bosqich joriy etiladi. 2025–2027 yillarda pilot loyiha Toshkentda amalga oshiriladi, keyin Navoiy va viloyat markazlarida, keyingi yillarda esa butun respublika bo‘ylab kengaytiriladi.