O‘zbekiston va Pokiston harbiy hamkorlikni kengaytirishga kelishib oldi

O‘zbekiston prezidenti Shavkat Mirziyoyev Pokiston Qurolli kuchlari Quruqlikdagi qo‘shinlari qo‘mondoni, Mudofaa kuchlari bosh qo‘mondoni — feldmarshal Asim Munir bilan uchrashuv o‘tkazdi. Bu haqda davlat rahbari matbuot xizmati xabar berdi.

Muzokaralar “Global Industrial and Defence Solutions” kompaniyasi bosh qarorgohida bo‘lib o‘tdi. Tomonlar harbiy hamda harbiy-texnik hamkorlikni kengaytirish istiqbollari, shuningdek, xavfsizlikka doir zamonaviy tahdid va xatarlarga qarshi kurashishda sa’y-harakatlarni muvofiqlashtirish masalalarini muhokama qildi.

Uchrashuvda ikki mamlakat mudofaa-sanoat majmuasining yetakchi korxonalari o‘rtasidagi kooperatsiyani chuqurlashtirish muhimligi ta’kidlandi. Harbiy mutaxassislarni tayyorlash dasturlarini rivojlantirish, tajriba almashish va qo‘shma mashg‘ulotlar o‘tkazishga alohida e’tibor qaratildi.

Shuningdek, o‘zaro manfaatli bo‘lgan transport-logistika sohasidagi istiqbolli infratuzilma loyihalarini amalga oshirishni jadallashtirish masalalari ham ko‘rib chiqildi.

Muzokaralar yakunida tomonlar harbiy va harbiy-texnik hamkorlikni rivojlantirish bo‘yicha yo‘l xaritasini tayyorlashga kelishib oldi. Uchrashuv so‘ngida O‘zbekiston prezidenti “Global Industrial and Defence Solutions” kompaniyasining ishlanmalari, jumladan, Pokistonda ishlab chiqarilgan zamonaviy harbiy texnika va qurol-aslahalar namunalari bilan tanishdi.