«O‘zbekiston hech qachon ochiqlik siyosatidan chekinmaydi» — Shavkat Mirziyoyev

O‘zbekiston ochiqlik siyosatini saqlab qoladi va uni izchil rivojlantirishni davom ettiradi, so‘z va matbuot erkinligini ta’minlash esa davlatning asosiy ustuvor vazifalaridan biri bo‘lib qoladi. Bu haqda Prezident Shavkat Mirziyoyev parlament va xalq oldidagi yillik murojaatida ma’lum qildi.

«Yana bir bor ochiq aytmoqchiman. Buni ham o‘ng quloq, ham chap quloq bilan eshitishsin. Keng ko‘lamli yangilanishlar davrida, Yangi O‘zbekiston davrida biz hech qachon ochiqlik siyosatidan chekinmaymiz», — deya ta’kidladi davlat rahbari.

Prezident so‘z va matbuot erkinligi mamlakat rivoji uchun ajralmas shart sifatida e’tibordan chetda qolmasligini bildirdi. Unga ko‘ra, bu haqda barcha — nafaqat hokimiyat vakillari, balki jamoatchilik ham xabardor bo‘lishi zarur.

Murojaatda fuqarolik jamiyati institutlarining roli alohida qayd etildi. Shavkat Mirziyoyev ularning faol ishtiroki amalga oshirilayotgan islohotlarning samaradorligi uchun muhim omil ekanini ta’kidladi. Shu munosabat bilan davlat nodavlat sektorga har tomonlama qo‘llab-quvvatlash siyosatini davom ettirishni rejalashtirmoqda.

Xususan, fuqarolik jamiyatini rivojlantirish bo‘yicha besh yillik strategiya ishlab chiqilishi ko‘zda tutilgan. Fuqarolik jamiyati institutlariga ijtimoiy buyurtmalar berish tizimi raqamlashtiriladi, moliyalashtirish hajmi esa ikki baravar oshiriladi. Shuningdek, xayriya tashkilotlarini yaratish tartibini soddalashtirish va ularning faoliyatining oshkoraligi hamda hisobdorligini yaxshilash mexanizmlari takomillashtiriladi.

Avvalroq Prezident erkin va mas’uliyatli OAVning ahamiyatini bir necha bor ta’kidlagan. 2023 yil fevralida u har kuni yangiliklarni o‘qishga vaqt ajratishini ma’lum qilgan, shu yilning may oyida esa ommaviy axborot vositalarini xalq fikrini davlat organlariga yetkazuvchi eng ta’sirli kuchlardan biri sifatida e’tirof etgan edi.