O‘zbekistonliklarni 8 Mart munosabati bilan qo‘shimcha dam olish kunlari kutmoqda

2026 yil mart oyida O‘zbekiston aholisi Xalqaro xotin-qizlar kuni munosabati bilan qo‘shimcha dam olish kunlariga ega bo‘ladi. 8 Mart yakshanba kuniga to‘g‘ri kelgani sababli, amaldagi qonunchilikka muvofiq dam olish kuni 9 mart — dushanbaga ko‘chiriladi.

Dam olish kunlari soni tashkilotlarda belgilangan ish jadvaliga bog‘liq bo‘ladi. Besh kunlik ish haftasida ishlovchilar 7–9 mart kunlari ketma-ket uch kun dam oladi. Olti kunlik ish haftasida esa dam olish kunlari 8 va 9 mart — yakshanba hamda dushanba bo‘ladi.

Barcha xodimlar ishga 10 mart, seshanba kuni qaytadi.

Mazkur tartib davlat va byudjet tashkilotlari uchun majburiy hisoblanadi. Xususiy korxonalarga ham ish jarayonining uzluksizligini ta’minlash va xodimlar uchun qulay sharoit yaratish maqsadida shunday jadvalga amal qilish tavsiya etiladi.