«Uzbekneftegaz» 2026 yildagi birinchi ish natijalari haqida prezidentga hisobot berdi

Prezident Shavkat Mirziyoyevga neft-gaz sohasidagi asosiy vazifalarni bajarish bo‘yicha hisobot taqdim etildi. Hisobotda bosh e’tibor 30 yanvar va 23 fevraldagi prezident topshiriqlarining ijrosiga qaratildi — «Uzbekneftegaz»ni modernizatsiya qilish, xom ashyo bazasini kengaytirish va zamonaviy qazib olish texnologiyalarini joriy etish.

Sohani rivojlantirish bo‘yicha yangi strategiya doirasida birinchi natijalar allaqachon qo‘lga kiritilgan. Yil boshidan beri mutaxassislar 471 kvadrat kilometr maydonda 3D-seysmik izlanishlar o‘tkazdi, bu esa burg‘ilash uchun istiqbolli hududlarni aniqlash va yangi uglevodorod konlarini topishga imkon beradi.

Shu bilan birga, mavjud infratuzilmani modernizatsiya qilish ishlari olib borilmoqda:

• 11 ta yangi yuqori debetli quduq ishga tushirildi;

• 20 ta faol obyektlarda ishlab chiqarish darajasini tiklash uchun kapital ta’mirlash ishlari amalga oshirildi;

• neft va gaz oqimini oshirishga qaratilgan 5 ta texnologik chora tadbir amalga oshirildi.

Majlisda soha korxonalarining operatsion samaradorligini oshirish masalasiga alohida e’tibor qaratildi. Prezident xarajatlarni qat’iy optimallashtirish va kompaniyalar moliyaviy barqarorligini mustahkamlash zarurligini ta’kidladi.

Uchrashuv yakunida davlat rahbari sohani aniq muhandislik hisob-kitoblari asosida modernizatsiya qilishni davom ettirish bo‘yicha topshiriq berdi. Asosiy vazifa — aholining va iqtisodiyotning energiya resurslariga bo‘lgan barqaror talabini ta’minlash.

Oldinroq Shavkat Mirziyoyev Qashqadaryo viloyatining ijtimoiy-iqtisodiy rivojlanishi masalalari bo‘yicha ham yig‘ilish o‘tkazgan va 2026 yilga ustuvor maqsadlar belgilangan.