Xorazmda sobiq IIB inspektori o‘lim bilan tugagan YTH va jabrlanganni qoldirish uchun sudlangan

Xorazm viloyati, Shavot tumanida sobiq IIB inspektori 29 yoshli ayolning o‘limiga sabab bo‘lgan YTH va jabrlanganni qoldirishda aybdor deb topildi.

Hodisa 2025 yil 27 sentabr kuni soat 22:14 atrofida Urganch — Shavot avtomobil yo‘lining 26-kilometrida sodir bo‘lgan. Xorazm viloyati IIB Jinoyatlarni oldini olish boshqarmasi ijtimoiy profilaktika bo‘limi katta inspektori Umarbek Atamuratov mast holatda, faralari o‘chirilgan Tracker-2 avtomobilini boshqarib, yo‘l chetida turgan ayolni urgan. Zarba tufayli ayol yo‘l qirg‘og‘idagi kanallarga uloqtirilgan. Haydovchi to‘xtagan, ammo sud aniqlashicha, u jabrlanganga yordam bermagan va favqulodda xizmatlarga xabar qilmagan, so‘ng voqea joyini tark etgan. Keyinchalik ayol shifoxonada vafot etgan.

Sudda ayblanuvchi o‘sha kechada spirtli ichimlik iste’mol qilganini tan olgan. Uning ketishiga esa pul olib kelib, davolanishga yordam berish niyati sabab bo‘lganini aytgan. Ammo guvohlar haydovchi noadekvat xatti-harakat qilganini va jabrlanganni qutqarish bo‘yicha hech qanday choralar ko‘rmaganini bildirgan. Marhumning eri ayblanuvchi voqea joyidan ketganini tasdiqlagan.

Sud Atamuratovni JK 266-moddasi 2-qismi (harakat xavfsizligi qoidalarini buzish, odam o‘limiga olib kelgan) va 117-moddasi 2-qismi (xavf ostida qoldirish) bo‘yicha aybdor deb topgan.

Ikki nafar voyaga yetmagan farzand, ilgari sudlanmaganligi va jabrlanuvchi bilan qisman yarashuvni inobatga olib, unga 3 yil 1 oy muddatga koloniyada jazoni o‘tash va uch yil muddatga transport vositalarini boshqarish huquqidan mahrum qilish jazosi tayinlangan.