Qorako‘l tumanida o‘quv markazining 20 nafar o‘quvchisi shifoxonaga yotqizildi

Buxoro viloyatining Qorako‘l tumanida yashab o‘qiyotgan va bir vaqtda o‘quv markazida ta’lim olayotgan 20 nafar o‘quvchi 11 yanvar kuni o‘z salomatligining keskin yomonlashuvi sabab shifoxonaga yotqizildi.

Viloyat sog‘liqni saqlash boshqarmasi ma’lumotiga ko‘ra, o‘quv markaziga tez tibbiy yordam chaqirilgan va jarohat olgan barcha o‘quvchilar viloyat tibbiyot birlashmasiga yetkazilgan. Ularning sog‘lig‘i bilan bog‘liq sabablarni aniqlash maqsadida qon tahlillari hamda zarur tekshiruvlar o‘tkazilgan.

Viloyat hokimi topshirig‘iga binoan mutaxassislar o‘quv markaziga tashrif buyurib, qo‘shimcha namunalar ham olishgan.

Shu kunning kechquruniga qadar barcha o‘quvchilar shifoxonadan chiqarilgan. Ularning holati qoniqarli deb baholanmoqda. Yoshlar ustidan vaqtinchalik nazoratni amalga oshirish uchun oilaviy shifokorlar va patronaj hamshiralar biriktirilgan. Hodisaning sabablari aniqlanmoqda.