Surxondaryoda erkak taqiqlangan materialni “layk”lagani uchun 3 yil qamoq jazosiga hukm qilindi.

Surxondaryo viloyati aholisi uch yil ozodlikdan mahrum etildi — bunga uning “Odnoklassniki.ru” ijtimoiy tarmog‘ida olti yil avval qo‘ygan «layk»i sabab bo‘ldi.

Viloyat sudlari matbuot xizmati ma’lumotiga ko‘ra, 2019-yilda sudlanuvchi U.A. Abdulloh domla (Abdug‘ani Umarov)ning “Jannatga oshiq­lar” nomli ma’ruzasini “klass” tugmasi bilan belgilagan. Ushbu materialda ekstremistik g‘oyalar mavjud deb topilgan va uni tarqatish O‘zbekistonda taqiqlangan.

Sudning qayd etishicha, fuqaro shu tariqa virtual do‘stlari orasida taqiqlangan kontentni tarqatgan hisoblanadi. Bu esa O‘zbekiston Respublikasi Jinoyat kodeksining 244−1-moddasi 3-qismi “g” bandiga (internet orqali jamoat xavfsizligiga tahdid soluvchi materiallarni tarqatish) to‘g‘ri keladi.

1-iyul kuni Kumqo‘rg‘on tuman sudining hukmi bilan erkak aybli deb topildi va umumiy tartibdagi koloniyada 3 yil ozodlikdan mahrum qilish jazosiga hukm qilindi. Sud, shuningdek, JKning 57-moddasini (yengilroq jazo tayinlash) qo‘lladi.

Eslatib o‘tamiz, “Ekstremizmga qarshi kurash to‘g‘risida”gi qonunga muvofiq, O‘zbekistonda ekstremistik xarakterdagi materiallarni olib kirish, saqlash, tayyorlash va tarqatish qat’iyan man etiladi.