Toshkentda avtomobillar uchun ekostikerlar berila boshlandi

Toshkentda yil boshidan avtomobillar uchun ekologik stikerlarni rasmiylashtirish boshlandi. Bu jarayon “Ekologik transport” tizimini joriy etish doirasida amalga oshirilmoqda. Yo‘l harakati xavfsizligi xizmati (YHXX) ma’lumotiga ko‘ra, dastlabki bosqichda dasturda ishtirok etish ixtiyoriy hisoblanadi.

Ekostikerlar bepul va muddatsiz beriladi. Ular avtomobilning ekologik toifasiga qarab uch rangga bo‘linadi: yashil (“toza”), sariq (“o‘rtacha”) va qizil (“zararli”). Yangi avtomobil xarid qilinib, YHXXda ro‘yxatdan o‘tkazilayotganda stiker avtomatik tarzda rasmiylashtiriladi.

Stikerni masofadan turib My.Gov.uz portali yoki uning mobil ilovasi orqali olish mumkin. Bu holatda pochta orqali yetkazib berish 10 kungacha vaqt oladi, pochta xizmati uchun to‘lov 20,6 ming so‘mni tashkil etadi. Shuningdek, YHXXga qarashli transport vositalarini diagnostik tekshiruv markazida — “Fayzobod” mahallasida ham rasmiylashtirish mumkin.

Avtomobilning ekologik toifasi ishlab chiqaruvchi tomonidan belgilangan klass asosida aniqlanadi. Agar bu haqda ma’lumot bo‘lmasa, transport vositasi diagnostikaga yuborilib, zararli chiqindilar miqdori baholanadi. Natijalarga rozi bo‘lmagan avtomobil egalari yiliga bir marta bepul qayta tekshiruvdan o‘tish huquqiga ega.

Shu bilan birga, Toshkent shahri va Toshkent viloyatida ekologik zonalarni shakllantirish ishlari olib borilmoqda. Avvalroq Ekologiya milliy qo‘mitasi huzuridagi Davlat ekologik ekspertiza markazi bosh direktorining o‘rinbosari Vyacheslav Shisyan ma’lum qilganidek, eko-zonalar chegaralari xalq deputatlari kengashlari qarorlari bilan bosqichma-bosqich tasdiqlanadi. Ushbu hududlar maxsus yo‘l belgilari bilan belgilab qo‘yiladi va elektron xaritada aks ettiriladi.

Yashil stikersiz avtomobillarning ekologik zonalarga kirishi cheklanadi. Biroq qoidabuzarliklar uchun jarimalar 2028 yil 1 yanvardan oldin joriy etilmaydi. Sariq va qizil stikerga ega transport vositalari uchun esa yiliga mos ravishda 1 va 3 bazaviy hisoblash miqdori miqdorida ekologik kompensatsiya to‘lovi belgilangan.

Cheklovlar favqulodda va tezkor xizmatlar, jamoat transporti (taksi va marshrutkalar bundan mustasno), tranzit avtomobillar, qishloq xo‘jaligi texnikasi hamda “nogironligi bo‘lgan shaxs” belgisi o‘rnatilgan transport vositalariga tatbiq etilmaydi. Shuningdek, eko-zonada yashovchi yoki ishlovchi fuqarolar, hamda shoshilinch tibbiy holatlarda kirishga ruxsat beriladi.