Toshkentda 816 ming kvadrat metr yo‘l ta’mirlanadi

Poytaxtda 2026-yil uchun yo‘llarni ta’mirlash rejasi tasdiqlandi. Keng ko‘lamli ishlar ob-havo barqarorlashgach, mart oyining birinchi o‘n kunligida boshlanadi.

Jami 816 ming kvadrat metr yo‘l qoplamasini yangilash rejalashtirilgan. Shundan 206,4 ming kvadrat metri markaziy ko‘chalarni ekspluatatsiya qilishga ixtisoslashgan boshqarma zimmasiga yuklatilgan, yana 609,7 ming kvadrat metr esa shaharning 12 tumani kesimida taqsimlangan.

Eng katta hajmdagi ishlar Chilonzor tumanida amalga oshiriladi — 54 ming kvadrat metr. Undan keyingi o‘rinlarda Bektemir (53,2 ming), Mirobod (52,3 ming) va Shayxontohur (51,2 ming) tumanlari turadi.

Yangi Hayot va Yakkasaroy tumanlarida 51 ming kvadrat metrdan, Sergeli va Mirzo Ulug‘bek tumanlarida 50,5 ming kvadrat metrdan, Yashnobod tumanida esa 50,4 ming kvadrat metr yo‘l qoplamasi yangilanadi.

Uchtepa tumanida 50 ming kvadrat metr, Olmazor tumanida 48,1 ming kvadrat metr, Yunusobod tumanida esa 47,5 ming kvadrat metr yo‘l tiklanadi.

Mutaxassislar yo‘llarda chuqurchalar paydo bo‘lishining asosiy sabablari sifatida qoplamaning tabiiy eskirishi, yog‘ingarchilikning ko‘pligi, qishda qo‘llaniladigan reagentlar hamda yuqori transport yuklamasini ko‘rsatmoqda. Ishlar havo isishi bilan uyg‘unlashtirilgan, chunki yuqori namlik sharoitida asfaltning mustahkamligini ta’minlash qiyin.

Rejaga ko‘ra, ta’mirlash ishlari ikki formatda olib boriladi: tezkor tarzda jiddiy nuqsonlarni bartaraf etish uchun kartochkali (yamoqli) ta’mir hamda eng muammoli uchastkalarda qoplamani kapital yangilash. Bu yondashuv resurslardan oqilona foydalanish va haydovchilar uchun noqulayliklarni kamaytirish imkonini beradi.