O‘zbekistonda yarim yil ichida 46 nafar talaba giyohvand moddalar savdosida gumonlanib qo‘lga olindi

O‘zbekistonda 2025 yilning dastlabki olti oyida 46 nafar oliy o‘quv yurti talabasi giyohvand moddalar savdosida ishtirok etgani uchun javobgarlikka tortildi. Bu haqda Prezident administratsiyasi huzuridagi Giyohvandlikka qarshi kurashish milliy markazining katta inspektori Muhammadqodir Mahmudov ma’lum qildi.

Uning so‘zlariga ko‘ra, talabalar tobora ko‘proq kuryer sifatida narkobiznesga jalb qilinmoqda, bu esa jiddiy ijtimoiy muammoga aylanmoqda. Shu bilan birga, mamlakatda yashirin narkolaboratoriyalar soni ham oshmoqda: agar 2024 yilda bunday besh obyekt aniqlangan bo‘lsa, 2025 yilning yarim yilligida ularning soni sakkiztaga yetgan.

Mahmudovning ta’kidlashicha, bu turdagi jinoyatlarni tashkil etuvchilarni aniqlash tobora qiyinlashib bormoqda, zamonaviy giyohvand moddalar esa shaklini o‘zgartirib, oddiy mahsulotlar — energetik ichimliklar, qahva yoki shirinliklar ko‘rinishida tarqatilmoqda.

— Eng dahshatlisi shundaki, bu moddalar bir martalik iste’moldan keyin ham qaramlikni keltirib chiqaradi va jins, yosh yoki ijtimoiy mavqeni ajratmaydi, — dedi ekspert.

Uning so‘zlariga ko‘ra, zamonaviy giyohvand moddalar yashirin ta’sir ko‘rsatadi va odatda tanib bo‘ladigan alomatlarga ega emas. Ularni iste’mol qilgan yoshlar o‘zini sergak va faol tutishi mumkin, bu esa ota-onalarni chalg‘itadi.

Milliy markaz ma’lumotlariga ko‘ra, yil boshidan buyon mamlakatda narkojinoyatlar soni o‘tgan yilning shu davriga nisbatan 23 foizga oshgan.

Mahmudov fuqarolarni, ayniqsa ota-onalarni, farzandlarining xulq-atvoriga e’tiborli bo‘lishga va giyohvand moddalar iste’moli belgilariga o‘z vaqtida munosabat bildirishga chaqirdi.