O‘zbekistonda 45 mingdan ortiq fuqaroda ov quroli mavjud

Ichki ishlar vazirligi ma’lumotlariga ko‘ra, O‘zbekistonda 45 mingdan ortiq fuqaro ov qurolini saqlash va ishlatish uchun ruxsatga ega. Bu haqda Jamoat tartibini muhofaza qilish xizmati bo‘limi boshlig‘i Davron Qosimov ma’lum qildi.

U fuqarolik va xizmat qurollari ustidan nazorat ichki ishlar organlari tomonidan amalga oshirilishini eslatib o‘tdi. Ov qurolini 25 yoshdan oshgan, ov jamiyatiga ro‘yxatdan o‘tgan va qurol bilan ishlash bo‘yicha 56 soatlik kursdan o‘tgan fuqarolar sotib olishi mumkin. Shuningdek, tibbiy tekshiruvlardan o‘tish va IIVdan ruxsat olish talab etiladi.

Hozirgi kunda mamlakatda IIVga qarashli 40 dan ortiq maxsus ov do‘konlari faoliyat yuritmoqda. Qurol egalari ustidan nazoratni profilaktika va litsenziyalash inspektorlari ta’minlaydi.

2025-yilning dastlabki sakkiz oyida qurolni saqlash va ishlatish qoidalarini buzganlik uchun 10 mingdan ortiq fuqaro ma’muriy javobgarlikka tortilgan. Shuningdek, 800 ga yaqin shaxs qurolni noqonuniy saqlash yoki ro‘yxatdan o‘tmaslik uchun jinoiy javobgarlikka tortilgan.

Yil boshidan buyon fuqarolar IIVga ixtiyoriy ravishda 1 000 dan ortiq qurolni topshirgan, jumladan, antikvar va kollektsion namunalari ham bor. Vazirlar Mahkamasi qarori №310ga muvofiq, qurolni ixtiyoriy topshirganlar uchun moliyaviy mukofot belgilangan.