O‘zbekistonda inson huquqlari bo‘yicha ta’lim dasturining beshinchi bosqichi boshlandi.

O‘zbekistonda 2026–2030 yillarga mo‘ljallangan Inson huquqlari bo‘yicha ta’limning Butunjahon dasturining beshinchi bosqichi boshlandi. Ushbu tashabbus doirasida mamlakatda ta’lim loyihalari, ilmiy tanlovlar hamda maxsus o‘quv dasturlarini amalga oshirish rejalashtirilgan.

O‘zbekiston Respublikasi Vazirlar Mahkamasi qaroriga muvofiq, dasturni amalga oshirish bo‘yicha “yo‘l xaritasi” hamda uning ijrosini nazorat qiladigan Milliy komissiya tarkibi tasdiqlandi.

Dastur davomida har yili “Inson huquqlari haftaligi”, huquqiy ta’lim masalalariga bag‘ishlangan ilmiy-tadqiqot loyihalari tanlovlari, shuningdek xorijda o‘qish va malaka oshirish uchun ochiq tanlovlar o‘tkaziladi.

Harbiy ta’lim tizimiga ham alohida e’tibor qaratiladi. Oliy harbiy va harbiylashtirilgan ta’lim muassasalari kursantlari hamda talabalari uchun “Inson huquqlari” nomli maxsus o‘quv kursi joriy etiladi.

Vazirlik va idoralar dastur ijrosi bo‘yicha har chorakda Milliy komissiyaga hisobot taqdim etib boradi. Komissiyaning ishchi organi etib O‘zbekiston Respublikasi Inson huquqlari bo‘yicha milliy markazi belgilangan.

Inson huquqlari bo‘yicha ta’limning Butunjahon dasturi 2004 yildan buyon bosqichma-bosqich amalga oshirilmoqda. Birinchi bosqich (2005–2009 yillar) maktablarga, ikkinchi bosqich (2010–2014) oliy ta’lim muassasalari, pedagoglar, davlat xizmatchilari va harbiylar tayyorlashiga qaratilgan. Uchinchi bosqich (2015–2019) OAV vakillariga bag‘ishlangan bo‘lsa, to‘rtinchi bosqich (2020–2024) yoshlar bilan ishlashga yo‘naltirilgan.

Beshinchi bosqich esa inson huquqlari sohasidagi ta’lim tashabbuslari qamrovini kengaytirish va o‘qitishning yangi formatlarini joriy etishga qaratilgan.