O‘zbekistonda notarial harakatlar pasportsiz — Face-ID orqali amalga oshiriladi.

O‘zbekistonda notarial xizmatlardan foydalanishda pasport talab qilinmaydi — fuqaroning shaxsini Face-ID orqali tasdiqlash joriy etiladi. Bu haqda 5-sentabr kuni Prezident Shavkat Mirziyoyevga taqdim etilgan, adliya tizimidagi davlat xizmatlarini soddalashtirish bo‘yicha choralar taqdimotida ma’lum qilindi.

So‘nggi sakkiz yil ichida adliya tizimida keng qamrovli islohotlar amalga oshirildi: qariyb 70 ta normativ-huquqiy hujjat qabul qilindi, adliya organlariga 20 dan ortiq qo‘shimcha vakolat berildi, 202 ta davlat xizmatlari markazi barpo etildi. Bugungi kunda aholiga 500 dan ortiq xizmat “yagona darcha” tamoyili asosida taqdim etilmoqda, hujjat olish muddati esa bir necha kundan 5–10 daqiqagacha qisqardi.

Shu bilan birga, hali ham byurokratik to‘siqlar saqlanib qolmoqda — 200 dan ortiq xizmat eski tartibda ko‘rsatilmoqda, chekka hududlarda esa xizmatlardan foydalanish imkoniyati cheklangan.

Rejalar 2027 yilgacha

• Davlat xizmatlari soni 900 taga yetkaziladi.

• Har yili “uch qadam” tamoyili asosida 80 ga yaqin xizmat soddalashtiriladi.

• Jamoat joylari va mahallalarda 1100 ta interaktiv kiosk o‘rnatiladi.

• 30 turdagi hujjatlarni taqdim etish talabi bekor qilinadi. Masalan, nikohdan o‘tayotganlardan tibbiy ma’lumotnoma so‘ralmaydi, harbiy komissariatlar esa yashash manzili bo‘yicha hujjat talab qilmaydi. Ma’lumotlar idoralar o‘rtasida avtomatik almashiladi.

Notariuslar

Bugungi kunda notariuslar 80 dan ortiq xizmat ko‘rsatadi, ammo ularning faqat 11 foizi onlayn shaklda mavjud. 2027 yilgacha 20 turdagi notarial harakatlar raqamlashtiriladi. Eng muhim o‘zgarish — pasport ko‘rsatish talabi bekor qilinadi, shaxsni tasdiqlash Face-ID orqali amalga oshiriladi.

Huquqiy ma’rifat

• Maxsus AdliyaTV platformasi ishga tushiriladi.

• “Aqlli tushuntirish” tizimi my.gov.uz, elektron pochta yoki shaxsiy kabinet orqali fuqarolar va tadbirkorlarga yangi qonunlar bo‘yicha shaxsiylashtirilgan xabarnomalar yuboradi.

Adliya vaziri Akbar Tashqulov ta’kidlashicha, yangi tizim manzilli huquqiy ma’rifat shakliga aylanadi:
“Agar kimdir tadbirkorlik bilan shug‘ullanishni boshlasa, biz unga aynan uning yo‘nalishiga tegishli yangi va amaldagi normativ hujjatlar, shuningdek, tushuntirish materiallarini yuboramiz”.