O‘zbekistonda Konstitutsiyaviy sudga murojaat qilish tartibi soddalashtiriladi

O‘zbekiston prezidenti Shavkat Mirziyoyev Konstitutsiyaviy sud faoliyatini takomillashtirish va zamonaviy raqamli texnologiyalarni joriy etishga qaratilgan farmonni imzoladi. Hujjat fuqarolar va yuridik shaxslarning murojaat qilish tartibini soddalashtirish, ortiqcha byurokratik to‘siqlarni bartaraf etishni nazarda tutadi.

Prezident matbuot kotibi Sherzod Asadovning ma’lum qilishicha, farmon konstitutsiyaviy adolatga kirish imkoniyatlarini kengaytirish, sud faoliyati shaffofligini hamda ishlarni ko‘rib chiqish samaradorligini oshirishga qaratilgan. Unda konstitutsiyaviy shikoyat institutini rivojlantirish va huquq hamda erkinliklarning sud orqali himoyasini kuchaytirishga alohida e’tibor berilgan.

Hujjat doirasida 2026–2027 yillarda Konstitutsiyaviy sud faoliyatini bosqichma-bosqich raqamlashtirish rejalashtirilgan. 2027 yil 1 avgustdan E-KSUD axborot tizimini ishga tushirish ko‘zda tutilmoqda. Ushbu tizim orqali murojaatlarni elektron shaklda yuborish, sud majlislarida onlayn ishtirok etish hamda ularni videokonferensiya formatida kuzatish imkoniyati yaratiladi.

Shuningdek, sud majlislarining onlayn translyatsiyasi yo‘lga qo‘yiladi, audioyozuv joriy etiladi va elektron bayonnomalar shakllantiriladi. Zarur ma’lumotlarni olish davlat axborot tizimlari bilan integratsiya orqali, fuqarolar va biznesga qo‘shimcha yuklamalarsiz amalga oshiriladi.

Kutilishicha, 2026 yilda Konstitutsiyaviy sud alohida binoga ko‘chiriladi, uning shtati sakkiz nafar xodimga kengaytiriladi. Farmon ijrosi Konstitutsiya ustuvorligini mustahkamlash va sud tizimiga zamonaviy, fuqarolarga yo‘naltirilgan mexanizmlarni joriy etishga xizmat qilishi ta’kidlanmoqda.