O‘zbekistonda metan quyish shoxobchalarining ishlashiga yana cheklovlar joriy etildi

O‘zbekistonda yana avtomobil gaz to‘ldirish kompressor stansiyalari (AGNKS) ishlashiga cheklovlar joriy etildi. Bu haqda dushanba kuni kechqurun O‘zbekiston Energetika vazirligi ma’lum qildi.

Xususan, Toshkentdagi metan quyish shoxobchalari shu kuni yopilgan, propanli AЗSlar esa odatdagidek ishlashda davom etgan.

Vazirlikning izohiga ko‘ra, cheklovlar havo haroratining pasayishi bilan bog‘liq. Sovuq ob-havo natijasida tabiiy gazga talab oshgan va ba’zi hududlarda gaz quvurlarida bosimning pasayishiga olib kelgan.

Vazirlik ma’lumotlariga ko‘ra, birinchi navbatda aholiga, shuningdek, tibbiyot, ta’lim muassasalari va jamoat transportiga gaz yetkazib berish ustuvor hisoblanadi.

«Ushbu choralar faqat sovuq kunlarda joriy etiladi va aholiga gaz yetkazib berishni barqaror ta’minlashga qaratilgan. Vaziyat barqarorlashgach, cheklovlar olib tashlanadi», — deyiladi vazirlik bayonotida.

AGNKSlarning aniq ish vaqti hozircha belgilanmagan. Energetika vazirligi ma’lum qilishicha, ularning ishlash tartibi har bir hududda vaziyatga qarab alohida belgilanadi.