Toshkent shahar sudi raisining sobiq o‘rinbosari va uch nafar sudyaga nisbatan jinoyat ishi qo‘zg‘atildi

O‘zbekiston Bosh prokuraturasi Toshkent shahar sudining sobiq rais o‘rinbosari Murodjon Mirzajonov hamda jinoyat ishlari bo‘yicha uch nafar sobiq sudya — Odilbek Ilhomjonov, Mirziyod Abidov va Muxtarama Turg‘unovaga nisbatan jinoyat ishi qo‘zg‘atdi. Ularning barchasi qamoqqa olingan.

Tergov ma’lumotlariga ko‘ra, jinoyat ishi sud ishiga aralashish va Akmal Shukurovga nisbatan chiqarilgan hukmni noqonuniy ravishda yengillashtirish bilan bog‘liq. 2025 yil oktyabr oyida Mirzo Ulug‘bek tuman jinoyat ishlari bo‘yicha sudi Akmal Shukurovni juda katta miqdordagi firibgarlik, bezorilik hamda qasddan og‘ir tan jarohati yetkazishda aybdor deb topib, uni 8 yil 1 oy muddatga ozodlikdan mahrum etgandi.

Apellyatsiya shikoyati kiritilgach, Toshkent shahar sudi sudlov hay’ati hukmni o‘zgartirib, Jinoyat kodeksining 57-moddasini qo‘llagan va jazoni 3 yilgacha qisqartirgan. Natijada mahkum sud zalining o‘zida ozodlikka chiqarilgan.

Bosh prokuratura ta’kidlashicha, Mirzajonov mansab vakolatlarini suiiste’mol qilgan holda apellyatsiya ko‘rib chiqilishi jarayonida sudyalarga noqonuniy ta’sir o‘tkazgan. Tergov versiyasiga ko‘ra, odil sudlov mustaqilligini ta’minlash majburiyatiga qaramay, sudyalar noqonuniy ko‘rsatmalarni bajargan va bu og‘ir oqibatlarga olib kelgan adolatsiz qaror qabul qilinishiga sabab bo‘lgan.

Tergov doirasida Mirzajonovga nisbatan O‘zbekiston Jinoyat kodeksining 231-moddasi 2-qismi va 236-moddasi 2-qismi bilan, sobiq sudyalarga esa 231-moddasi 2-qismi bilan ayblov e’lon qilingan. Hozirda tergov harakatlari davom etmoqda.

Eslatib o‘tamiz, 2025 yil dekabr oyida Toshkent shahar prokuraturasi nazorat protesti kiritganidan so‘ng apellyatsiya qarori bekor qilingandi. 18 dekabr kuni Toshkent shahar sudining nazorat instansiyasi Akmal Shukurovga qayta 6 yil ozodlikdan mahrum etish jazosi tayinladi. Qamoqda o‘tkazilgan vaqt inobatga olingan holda, unga yana 5 yil 3 oy 12 kun jazoni o‘tash qolgan.