Tesla’ning AQSh bozoridagi ulushi 2017 yildan beri eng past darajaga tushdi.

AQShda Tesla’ning elektr avtomobillari bozoridagi ulushi avgust oyida 38% ga tushdi — so‘nggi sakkiz yil ichidagi eng past ko‘rsatkich. Bu haqda Reuters agentligi Cox Automotive tadqiqot kompaniyasi ma’lumotlariga tayanib xabar berdi.

Bu Tesla ulushi 40% ostiga tushgan birinchi holatdir, oxirgi marta bunday holat 2017 yil oktyabrida, kompaniya Model 3’ni ommaviy ishlab chiqarishni boshlagan paytda kuzatilgan. Taqqoslash uchun, ilgari Tesla AQSh bozorining 80% dan ortig‘ini nazorat qilgan.

Mutaxassislar ta’kidlashicha, bu pasayish raqobatning ortishi bilan bog‘liq: yirik avtomobil ishlab chiqaruvchilar yangi elektr avtomobillarini bozorga chiqarishmoqda, Tesla esa robototexnika va sun’iy intellekt loyihalariga e’tibor qaratib, arzon modellarning chiqarilishini keyinga qoldirdi.

So‘nggi yangi model — 2023 yilda taqdim etilgan Cybertruck pikapi bo‘ldi. Biroq u Model 3 va Model Y muvaffaqiyatini takrorlay olmadi. Model Y yangilangan bo‘lsa-da, ilgari dunyoda eng ko‘p sotilgan avtomobil bo‘lgan, talab kutgandek bo‘lmagan va kompaniya savdosi ikki yil ketma-ket kamaymoqda.

Cox ma’lumotlariga ko‘ra, iyul oyida AQShda elektr avtomobillari savdosi 24% dan ortiq oshib, 128 268 birlikni tashkil qilgan. Shu bilan birga, Tesla savdosi 7% ga o‘sib, 53 816 ta mashinaga yetgan, ammo uning bozor ulushi pasayishda davom etgan.

Analitiklar prognoz qilishicha, AQShda elektr avtomobillari savdosi sentyabrgacha o‘sadi, so‘ng federal soliq imtiyozlari (\$7500) tugashi sababli talab kamayishi mumkin. Bu Tesla va boshqa avtomobil ishlab chiqaruvchilariga moliyaviy bosimni kuchaytiradi.

«Agar sizning avtomobil kompaniyangiz bo‘lsa va yangi mahsulotlaringiz bo‘lmasa, ulushingiz pasayishni boshlaydi», — dedi Cox’ning sanoat tahlili bo‘yicha direktori Stefani Valdes Striti.