O‘zbekistonda yillik inflyatsiya 8,8% gacha pasaydi — Statistika agentligi

2025 yil avgust oyida O‘zbekistonda yillik inflyatsiya 8,8% ni tashkil etdi, deya xabar berdi Statistika agentligi. Shu bilan birga, iste’mol narxlari bir oyda o‘rtacha 0,4% ga oshgan.

Meva va sabzavotlarning mavsumiy narx o‘zgarishlarini hisobga olmaganda, inflyatsiya darajasi yuqoriroq — 9,4% bo‘ldi.

Oziq-ovqat mahsulotlari

Avgust oyida oziq-ovqat mahsulotlari 0,6% ga qimmatlashdi (yillik hisobda — 6,7%). Asosan, tovuq go‘shti (+2,1%), qo‘y go‘shti (+1,4%) va mol go‘shti (+0,7%) narxlari oshdi. Shu bilan birga, guruch (–0,1%), lag‘mon (–0,4%) va oliy navli un noni (–0,2%) biroz arzonlashdi.

Meva-sabzavotlar ichida eng katta narx o‘sishi tarvuz (+28,7%), qovun (+11,7%) va karam (+11,4%)da qayd etildi. Aksincha, pomidor (–16,8%), uzum (–5,4%) va bodring (–3,1%) arzonlashdi.

Nooziq-ovqat mahsulotlari va xizmatlar

Nooziq-ovqat mahsulotlari narxlari 0,3% ga oshdi (yillik o‘sish — 6,6%). Xizmatlar ham 0,3% ga qimmatlashgan, biroq ularning yillik inflyatsiyasi ancha yuqori — 16,2%.

Eng katta ta’sir transport xarajatlari bilan bog‘liq bo‘ldi: benzin bir oyda 3,1% ga, propan 0,6% ga qimmatlashdi, metan narxlari esa o‘zgarishsiz qoldi. Avtomobil ta’mirlash xizmatlari 0,6% ga, haydovchilik maktablari xizmatlari esa 1,6% ga oshdi.

Hududiy farqlar

Avgust oyida eng katta narx o‘sishi Buxoro viloyatida qayd etildi (+0,7%). Yillik inflyatsiya bo‘yicha yetakchi esa Farg‘ona viloyati bo‘ldi — 9,7%. Taqqoslash uchun, Toshkent shahrida yillik ko‘rsatkich 8,7% ni tashkil etdi.