O‘zbekistonda yashirin iqtisodiyot

O‘zbekistonda 27 mingta qurilish kompaniyasining 41 foizi faqat bitta xodimni rasmiy vakil sifatida ko‘rsatgan. Bu 10,9 mingta qurilish korxonasini tashkil etadi.

Prezident Shavkat Mirziyoyev bu haqda 16-yanvar kuni o‘tkazilgan yig‘ilishda ma’lum qildi. Unga ko‘ra, bunday kompaniyalarning aksariyati Toshkent (2 249), Toshkent viloyati (1 087) va Samarqandda (837) joylashgan. 2023-yilda ushbu quruvchilar 4 trln so‘mlik qurilish ishlarini amalga oshirgan.

Prezident misol tariqasida Toshkentdagi BM Group qurilish kompaniyasini keltirdi. U faqat 3 nafar rasmiy xodim bilan 62 xonadondan iborat, 20 mlrd so‘mlik uy-joy barpo etgan. Shuningdek, taxminan 5 mingta fermer xo‘jaligi ham faqat bitta ishchini ko‘rsatgani qayd etildi.

Shavkat Mirziyoyev ta’kidlashicha, bugungi kunda qariyb 5 mln kishi norasmiy sektorlarda mehnat qilmoqda va ularga ish haqi to‘layotgan tadbirkorlar soliqlarni to‘lamayapti.

Yig‘ilishda qayd etilishicha, soya iqtisodiyoti mamlakat YAIMiga 135 trln so‘m, davlat byudjetiga esa 30 trln so‘m zarar yetkazgan.