AQSh apellyatsiya sudi Tramp bojlarini noqonuniy deb topdi

AQSh apellyatsiya sudi ko‘pchilik ovoz (7 ga qarshi 4) bilan Donald Trampning ikkinchi prezidentlik muddati davrida joriy etilgan bojlarning katta qismini noqonuniy deb topdi. Ushbu qaror Trampning xalqaro iqtisodiy siyosatdagi asosiy vositasi sifatida tariflardan foydalanishini shubha ostiga qo‘ydi.

Shu bilan birga, sud bojlarni 14-oktabrgacha kuchda qoldirdi, bu vaqt mobaynida ma’muriyat qarorni Oliy sudga shikoyat qilishi mumkin. Yakuniy so‘zni endi AQSh Oliy sudi aytadi.

Tramp bojlarni tashqi iqtisodiy bosim va savdo kelishuvlarini qayta ko‘rib chiqish vositasi sifatida qo‘llagan edi. Unga ko‘ra, bu choralar AQShga savdo hamkorlaridan yon berishlarga erishishda yordam bergan, biroq bozorlarda beqarorlikni kuchaytirgan.

Eks-prezident sud qarorini “juda xolis emas” deb atadi va Oliy sud uni bekor qilishiga ishonch bildirdi: “Agar bu bojlar bir kun bekor qilinsa, bu mamlakat uchun falokat bo‘ladi”, — deb yozdi u Truth Social’dagi sahifasida.

Sud qarorida Tramp Xalqaro favqulodda iqtisodiy vakolatlar to‘g‘risidagi qonun (IEEPA) doirasidagi vakolatlarni oshirib yuborgani aytildi. Ushbu qonun avval asosan sanksiyalar va aktivlarni muzlatib qo‘yish uchun qo‘llangan, ammo hech qachon bojlarni belgilash uchun ishlatilmagan.

Biroq qaror Tramp tomonidan boshqa huquqiy asoslarda joriy etilgan po‘lat va alyuminiy importiga qo‘yilgan bojlarni qamrab olmaydi.